{"id":8816,"date":"2016-11-19T12:42:12","date_gmt":"2016-11-19T11:42:12","guid":{"rendered":"https:\/\/mariaroja.com\/a-graza-da-desgraza-humana-no-tolleito-de-inishmaan-de-mcdonagh\/"},"modified":"2016-11-19T12:42:12","modified_gmt":"2016-11-19T11:42:12","slug":"a-graza-da-desgraza-humana-no-tolleito-de-inishmaan-de-mcdonagh","status":"publish","type":"post","link":"https:\/\/mariaroja.com\/gl\/a-graza-da-desgraza-humana-no-tolleito-de-inishmaan-de-mcdonagh\/","title":{"rendered":"A GRAZA DA DESGRAZA HUMANA N\u2019O TOLLEITO DE INISHMAAN de McDonagh"},"content":{"rendered":"
<\/div>\n

A GRAZA DA DESGRAZA HUMANA N\u2019O TOLLEITO DE INISHMAAN de McDonagh<\/h3>\n

Cr\u00edtica de Afonso Becerra de Becerre\u00e1 para O Gali\u00f1eiro de Praza P\u00fablica<\/strong><\/p>\n

Fotograf\u00eda: Ra\u00fal Lorenzo<\/p>\n

Nunha extraescena ateigada de vacas, pedras e mar, o palco am\u00f3sanos unha sociedade pechada, igual que pechado \u00e9 o modelo do drama (coa s\u00faa presentaci\u00f3n o seu n\u00f3 e o seu necesario desenlace, nunha cadea de sucesos causalmente xustificados).
\nO tolleito de Inishmaan de Martin McDonagh \u00e9 un drama sobre a graza da desgraza humana, nunha Dogville quizais, aparentemente, menos virulenta, pero igualmente prexuizosa.
\nA desgraza dun tolleito que necesita realizarse como persoa, que necesita sentirse querido e respectado. Neces\u00edtao porque lle falta nesa vila e nesa illa na que o diferente a\u00ednda sofre m\u00e1is que resto.
\nIntenta fuxir, marchar a facer as am\u00e9ricas, onde poida realizarse afastado das estiquetas da illa e da vila. Pero a morri\u00f1a, o agarimo polos seus, e aquilo de que m\u00e1is vale malo co\u00f1ecido que bo por co\u00f1ecer, fano retornar.<\/p>\n

O espect\u00e1culo de Contraproduci\u00f3ns, dirixido por C\u00e1ndido Paz\u00f3, ofr\u00e9cenos un retrato pintoresco, tanto no trazo da maior\u00eda dos personaxes, como na perspectiva desde a que se representan as situaci\u00f3ns.
\nPaz\u00f3 consegue unha coralidade no reparto que lle serve para reflectir, a trav\u00e9s de oito personaxes presentes, e alg\u00fans outros ausentes referenciais, sobre toda unha sociedade, coa que a galega, quizais, tam\u00e9n pode asociarse.<\/p>\n

O elenco constr\u00fae os personaxes tipific\u00e1ndoos e estereotip\u00e1ndoos e, deste xeito, danlles unha certa previsibilidade de comedia ou farsa, por\u00e9n, todos eles te\u00f1en aspectos caracterol\u00f3xicos que enriquecen e contrastan o baixo continuo da tipificaci\u00f3n ou do estereotipo. E con isto, Susana Dans, Ana Santos, Evaristo Calvo e Marcos Pereiro ofr\u00e9cennos unhas criaturas que, malia a previsibilidade de comedia, suscitan tam\u00e9n unha intriga de drama que nos fai observalos con atenci\u00f3n, porque sempre sospeitamos que agochan algo m\u00e1is do que amosan.<\/p>\n

Un caso diferente son os personaxes interpretados por Santi Romay, que fai de tolleito, Mar\u00eda Roja, Luis Iglesia e Ricardo de Barreiro. Aqu\u00ed prima un realismo sen apenas acento na tipificaci\u00f3n nin no estereotipo. Tr\u00e1tase de personaxes cunha dicci\u00f3n e unha actitude que non soa a teatro. Santi Romay comp\u00f3n un tolleito, fisicamente complexo, por\u00e9n a interpretaci\u00f3n non redunda na rareza nin na anomal\u00eda da forma f\u00edsica. De tal maneira, a identificaci\u00f3n afectiva da recepci\u00f3n, vai, pouco a pouco, centraliz\u00e1ndose no personaxe do eivado.<\/p>\n

No entanto, a coralidade do reparto non se perde e creo que nisto Paz\u00f3 cosegue, en certa maneira, unha boa baza, xa que eleva a lectura a un nivel m\u00e1is sociol\u00f3xico e antropol\u00f3xico.
\nE faino sen renunciar a efectismos sentimentais, explicitados no emprego de m\u00fasica que subli\u00f1a a emoci\u00f3n, nin efectos c\u00f3micos de ton inxenuo, por veces, ou con humor negro, noutros intres.
\nAo final, O tolleito de Inishmaan \u00e9 como un conto para teatro, cunha dimensi\u00f3n parab\u00f3lica.<\/p>\n

+info:
\nhttp:\/\/teatro.prazapublica.com\/post\/153362051241\/a-graza-da-desgraza-humana-no-tolleito-de<\/a><\/p>\n<\/div><\/section>
\n\n